Tuntut Eleumei Akhirat-Donya

Assalamu’alaikum kawom Eseulam
Gampong ngon peukan bandum syedara
Bacut lon teu oh bhah pendidikan
Keu aneuek badan jantong hate ma

Geutanyoe udep di dalam alam
Wajeb hai rakan eleumee beuna
Meutan eleumee di dalam badan
Tanyoe meulanglang udep lam donya

Lagee sijaloh jemeuboh pihtan
Timoh dalam blang hana soe suka
Hana soe sayang kayee lagee nyan
Geukoh ngon parang peugot keu unja

Meuna eleumee di dalam badan
Lagee bak mamplam ureueng le pula
Meunan ibarat wahee e rakan
Hina bak Tuhan hina bak donya

Leubeh deurajat ureueng meuiman
Geukheuen ureueng nyan teungku ulama
Nabi geutamse ibarat bintang
Di langet manyang jebeudoh cahya

Buleuen nyang seupot gulita malam
Jiteubiet bintang peungeueh ngon donya
Meunan hai teungku nabi tamselan
Peunteng hanaban eleumee beuna


Wajeb meununtut inong ngon agam
Bah pih hai taulan u nanggroe Cina
Eleumee agama mita beurijang
Meunan cit rakan  eleumee donya

Carong agama taat sembahyang
Carong pengetahuan tanyoe mulia
Lagee Habibie miseue   teuladan
Geupeugot kapai PT Nusantara

Eleumee agama pih carong hanban
Ta’at keu Tuhan Allah Ta’ala
Bek tiyeup donya hana meuiman
Eleumee alam carong lagoina

Hana jituri agama Tuhan
Hadih fireuman hana jinietna
Ureueng lagee nyan cit musoh Tuhan
Uroe kemudian asoe nuraka

Wahe  adoe lon inong ngon agam
Jak adoe intan  nibak ulama
Tajak meureunoe agama Eseulam
Mangat jeuet tapham akherat donya

Udep geutanyoe di dalam alam
Khalifah Tuhan Azza Wajalla
Tuntut eleumee kareuna Tuhan
Bekna hai rakan kareuna donya

Leupah that seunang taduek bineh blang
Deurui hanaban angen sabena
Mumada ohnoe lon tuleh nadham
Kirem keurakan bandum syeedara

T.A. Sakti
Banda Aceh