HABA PEUINGAT Sya'ir : Medya hus.

Ammabakdu laju tatuléh.
Sampoe beu abéh Ca é tasusôn.
Nabacut haba wahé e Waréh.
Dua lhèe baréh karangan bak lôn.

Haba lôn kirém meuchén 'oh habéh.
Deungön até gléh h'ana meurabôn.
Keudum kawôn droe blah noe ngön blah déh.
Sinoe ngön sidéh Banda ngön Dusôn.

Daweuet lôn keubah bak kertah putéh.
Baét ngön baréh meu ék ngön meutrôn.
Haba nasihat meuhat lôn tuléh.
Beujeuet keu Tambéh narit bak ulôn.

Meunurôt Ileumèe ny'ang mèe tapeucéh.
Meunurôt aréh dum nan tapeutrôn.
Rot Seni Sastra haba lôn reuntéh.
Bejeuet peunuléh peunaw'a rihôn.

Seusama Islam saban saban e Waréh.
Taingat beugléh até bèk rabôn.
Salah ngön silap pat na meuguréh.
Ingat beu abéh bèk karan karôn.

Dalam hudép nyoe tanyoe beu aréh.
Bèk sampé meukréh Syèthan peurawôn.
Meunyö kasilap teukap bruek lipéh.
Nasihat Waréh beujeuet keu Duk

Bukon that sayang takalon tapéh.
Gajitôt habéh asap meugulông.
Haba peuingat tasambat tuléh.
Baca beu abéh uram ngön ujông.

Keadaan nanggroe jinoe tareuntéh.
Inoe ngön idéh ka ta eu langsông.
Jameun Modèrèn meurèn-rèn habéh.
Ny'ang Iman lipéh jadèh digulông.

Meumacam bangön takalon meucéh.
Blah noe ngön blah déh kuta ngön gampông.
Le turôt Syèthan rot jalan paléh.
Bak buet ny'ang jayéh ka ramè dukông.

Bak jalan rot wie meuputie keudéh.
Ladôm meupayéh rhôt dalam urông.
Jalan Nuraka hawa 'oh habéh.
Syuruga ny'ang gléh h'ana soe sanjông.

Judi ngön tarôh éh rôh buet paléh.
Jak rabu abéh geu balôt bakông.
Nyöna piasan malam h'ana éh.
Beuceukang beutéh h'ana thèe untông.

Ladôm bloe buntut jeuheut ngön reugéh.
Ny'ang leubèh paléh judi meu sabông.
Nyan buet lam nangroe sinoe ngön sidéh.
H'ana soe langgéh ureueng jak sinthông.

Bak meu èn batèe pih seudèe abéh.
Karu ngön Matéh di Apa Galông.
H'ana geukira hareuta dikréh.
Όh watèe reugéh barô pèh pungông.

Di Aneuk Inöng meukeunöng meucéh.
Pakaiyan gop jéh geupakèk langsông.
Sileuweue pay'ang 'ok reupang di kréh.
Bajèe pih lipéh arat bak kitông.

Ho ny'ang galak droe jak keunoe keudéh.
H'ana lé patéh na sihat Makdông.
Ayah ngön Poma cara ka abéh.
Nyö Aneuk paléh teubiet ie idông.

Kon mantong Dara ka takalon gléh.
Ny'ang Muda paléh pih na di gampông.
Peugot peue galak jak ho teuseuréh.
Ladôm geujéb jéh ie ta eun gulông.

Model di bajèe lagèe that seudéh.
Ijô ngön putéh na itam galông.
Adat Budaya ka h'ana patéh.
Moral kalipéh Iman kasirông.

Jak manoe safa gura 'oh habéh.
Di panté duek éh meusigông-sigông.
Manoe saboh bhan meujan meutindéh.
Ala peurancéh karamè ny'ang rhông.

Pergaulan bebas leupah that paléh.
Akhlaq dikréh remaja gampông.
H'ana ék tatham buet nyan talanggéh.
H'an soe ba puréh ceunuet bak pungông.

Katrôk bak masa Agama reugéh.
Iman le lipéh pikéran sirông.
Siseuen-seuen bacut tirut ban puréh.
Όh akhé habéh nyö tan tadukông.

Nyö bak Meuseujid cit dit trôk waréh.
Nyö bak buet paléh ramè ny'ang arông.
Nyö bak buet désya gembira abéh.
Nyö bak buet ny'ang gléh beu-o geu tampông.

Nyan keuh jeuet bala tarasa peudéh.
Meutindéh-tindéh Allah Geu sinthông.
Kareuna Hamba désya meulapéh.
Seusama waréh meukoh-koh reubông.

Paké ngön meupoh h'an gadoh beugléh.
Sinoe ngön sidéh di kuta gampông.
Allah h'an riza désya ta tindéh.
Bah sidroe paléh teutap geusinthông.

Takalon bala teuka meulapéh.
Padé dum putéh rangoe ôn tutông.
Kareuna Hamba di puga paléh.
Bak buet ny'ang jayéh teulangsông.

Kon keuh salah gop meuleuhop beutéh.
Kon salah puréh ruhung keutupông.
Salah geutanyoe sinoe e-waréh.
H'ana tapatéh printah Ny'ang Agông.

Kon salah ubông anjông katiréh.
Kon salah baréh tulésan sirông.
Kon salah rangkang ka irang bintéh.
Kon salah payéh habéh ôn tutông.

Kon salah jalô tajô lam paréh.
Kon salah uréh bui pajôh jagông.
Kon salah teubèe peureudèe tangleh.
Kon salah Naléh h'ana asoe krông.

Kon salah itam meuligan putéh.
Kon salah tapéh bak-u, layèe ôn.
Kon salah Musang pisang dum habéh.
Kon salah tuléh h'ana gèt pantôn.

Kon salah Nanggroe jeut sagoe peudéh.
Deungön haté gléh piké rakan lôn.
Ulah Manusia Angkara paléh.
Sinoe ngön sidéh bala neu peutrôn.

Bukon that sayang bintang peureuséh.
Syahya h'anlé gléh leumah udusôn.
Kale that Hamba lam dônya tan gléh.
Haté meuguréh mata ka rabôn.

Moral kakeusieb kadit that ny'ang gléh.
Iman kalipéh sosial di trôn.
Meuyö Akhérat ingat kalipéh.
Ny'ang bagah patéh dôya peu ayôn.

Meunan ibarat lôn surat Tambéh.
Cipiké beugléh e-syédara lôn.
Hukôm tan teupat rakyat le meukréh.
Leka meulanggéh printah Ilahôn.

Beureukat tanlé haté meuguréh.
Seusama waréh le ka meukôn-kôn.
Tanaman Nanggroe sinoe ngön sidéh.
Hama meulapéh sabé tiep-tiep thôn.

Kajeuet syédara tarasa peudéh.
Bala meulapéh banda ngön dusôn.
Tabeudoh jinoe woe bak jalan gléh.
Sampôh beu habéh buet-buet ny'ang rabôn.

Peukong Syari'at ngat Nanggroe beurséh.
Bèk lé tacuréh adang bak ubôn.
Peuji-ôh jeuheut pubuet ny'ang gléh-gléh.
Po Nyoe ngön Po Jéh hudép beurukôn.

Pengarang : Medya Hus Kr.Sabé.