PEUTRON ANEUK
Oleh: T.A SaktiJameun ka maju sang dumpeue bereh
Keu adat Aceh hansoele kira
Buet peutron aneuk bacut lon cukeh
Lam adat Aceh lethat seumpeuna
Aneuk ban lahe umpama bijeh
Gohlom jeuet puweh dirumoh tangga
Peuetploh peuet uroe tanyoe payah preh
Baro phon jadeh jeuetba uluwa
Na saboh adat gotthat teuleubeh
Dinanggroe Aceh jameunkon kana
Aneuk geupeutron phon-phon peutateh
Budaya Aceh pusaka Maja
Peugot khanduri beurangkri raeh
Do’a beuleubeh akan aneukda
Didonya makmu akhirat bereh
Udep lam leubeh malem ngon kaya
Oek phon geucuko peusijuek geupreh
Peucicap jadeh geubri ie saka
Meunye aneuk phon lelom teh-pureh
Tan ulon cukeh panyang lagoina
Manyak geupeutren le ureueng preh-preh
Teuseungeh-seungeh dileuen meubanja
Aneuk lam tingkue rinyeun geutateh
Mablien ngon rumeh bri saleuem sigra
Mangat aneuk nyan ‘oh rayek baleh
Bek mbong ngon wareh rakan syeedara
Meunan seumpeuna saleuem that leubeh
Udep bek teupeh ngen ureueng lingka
Geuproh deungon U ie jih meureh-reh
Umpama jadeh sang ujeuen teuka
Jan kilat soseue geulanteue aleh
Aneuk bek teupeh jih hate goga
Geujak-jak dileuen Mablien tan geuweh
Kayee geukareh geupangkee sigra
Manyak geuba-ba geuharap gigeh
Hareukat bereh jeumot usaha
Geukheunle Maja sira meuheh-heh
Beujeumot saheh hai bijeh mata
Bek preh geuleupak gobtop pat aleh
Keudroe takikeh sigala daya
Meunan meukeusud bacut lon syareh
Budaya Aceh lethat seumpeuna
Meuhan neupateh ban ulon cukeh
Ubak Teungku Syeh neujak pareksa
Dianeuk inong keunong ka saheh
Nyang agam leubeh meutamah cara
Geucang bak pisang t’am t’um beude keh
Adak prang jadeh jeuet keu panglima
Lawet ka tanle dum rumoh Aceh
Aneukmiet jadeh soe peutron hana
Peuteubiet uleuenle ureueng leubeh
Seumpeuna geupreh taqwa bahgia
T.A. Sakti
Peminat sastra Aceh
Bala Peunyaket
Oleh: T.A Sakti
Assalamu’alaikom bunda ngon waled
Di gunong buket bandum lon sapa
Bacut lon ceukot haba peunyaket
Jinoe jililet dum manusia
Ureueng masa nyoe hudep meupiret
Keunong peunyaket rab rata-rata
Umu peuet ploh thon mula phon saket
Baro “meugansyeb” ‘oh tinggai donya
Bit beutoi jinoe jameun panyaket
Bandum jipiret kuta ngon desa
Sidroe-droe ureueng peuet-nam panyaket
Sayang that hudep dalam seungsara
‘Oh tabloe ubat bah that hek tajeb
Teuma peunyaket cit puleh hana
Paleng na reuda nyan kureueng saket
Tapiyoh tajeb saket lom teuma
Dum ureueng papa sabab peunyaket
Sampe meusingklet publoe pusaka
Dokter ngon Mantri kaya meubuket
Gukurek ringget pasien teuka
Pakon masa nyoe lethat peunyaket
Meupalet-palet ureueng calitra
Ie seumprot hama Tapajoh tajeb
Lam breueh meusudep dan palawija
Bak ureueng awam meunan geurateb
Salah ngon sulet tan soe pareksa
Bak Popeurintah kisah lon peudeb
Neubri bekle treb ngon tulak bala!!!
Alhamdulillah kisah rab keumaih
Meung panyang naf’aih laju neu baca
Bak Pak Medya Hus bacut ulon s’ah
Neu tulong ubah jinoe irama!!
Pusat Kesehatan Masyarakat nama PUSKESMAS
Nan that bit keumaih peseunang hate
Di kecamatan jidong Puskesmas
Jan-jan “ikhlas” bayeue-bayeue pre
Nan di kabupaten mulai ganaih
Sang-sang ka neuh’aih kuyut lam hate
Nan RUMOH SAKET meupalet naf’aih
Kon ban PUSKESMAS indah bukonle
Tingkat provinsi lom-lom meutamah
Lepah that neuh’aih nama UGD
GAWAT DARURAT nan teudong naf’aih
Nyawong ngon badan sang-sang ka meucre
Rakyat di gampong jeuoh ngon HUMAS
Tansoe cang panah nyang bri tafeuse
Maka seubab nyan meulakee meu’ah
Neu gantoe bagah nan ganje-ganje
Teumpat meu-ubat nan jih beuramah
Bek teudong naf’aih ulee meupuwe
Peue lom ngon nyamok that jeungkat-jeungkat
Maken keunong that nan “RUMOH MATE”
Bak palang nama tuleh beujeulah
Bek hanya cok gah lam bahsa kafe
Peuet boh bahasa baro jeuet kheun paih
Bahasa Aceh tuleh bak akhe!!!
Kireman : T.A. Sakti
Banda Aceh
Umpung Keumuto
Oleh: T.A Sakti
Bacut ta peugah kisah keumuto
Binatang bako leupah that bisa
Meu’en toe ngon jih bek peuko-peuko
Meung sampe jilho saket leupah jra
Bak bungong kayee kayem jipopo
Sinan keumuto rame meudoda
Bak jantong pisang kadang ji meulho
Sabab teugeuso : sihat ngon teuga
Kadang bineh mon teuka keumuto
Kayem meusigo musem khueng raya
Keumuto ka grah ie tan pat cawo
Keu aneuk -cuco ie dijak mita
Kadang tumpoek broih dijak ceumeulho
Jimita keudo makanan pat na
Bak sisek eungkot sinan jipopo
Soe nyang teugeuso keumong keupala
Akai tan jeungkat memang keumuto
Asai bek tako peukaru mula
Maseng lam buet droe bek meucokalo
Sajan keumuto hanjeuet keumara
‘Oh watee malam bandum meusaho
Jiwoe keumuto u rumoh tangga
Bak cabeueng kayee umpung keumuto
Tan beu-o beu-o peuget bersama
Phon-phon takalon naban ek malo
Umpung keumuto mula pertama
Han jan takalon silap ka tuwo
Umpung keumuto ka ube tima
Kayem aneukmiet teugeuso-geuso
Umpung keumuto ka ji geulawa
Jirhom ngon kayee-batee jipeupo
Umpung keumuto anco ban sira
‘Oh lheueh jitagu jiplueng ban muto
Keumuto bre-bro teubiet uluwa
Pasukan siap ngon mata seso
Beungeh keumuto deundam meumbara
Aneukmiet tagu jeuoh tan meuho
Bah that keumuto hekpo jak mita
Dendam goh puleh meugareh keudo
Soe kheundak bak Po ureueng nyan rasa!!
Ureueng woe diblang ban lheueh ceumeulho
Dikap keumuto nibak keupala
Aneuk sikula jak-woe meusigo
Dum mieng ka baso keumuto raba
Bak woe kuliah singgah padum ho
Sinan keumuto dum rusak-luka
Laju dipagap dikap meuranjo
Keumong maup’o-p’o ka reuh’op muka
Peue nyang meudiyeueng dipucrok dum ho
Beungeh keumuto cit gohlom reuda
Kameng ngon leumo nyang keunan ke-ko
Kadang sampe klo keumuto seuba
Ureueng tan salah habeh jiseudo
Paleh keumuto meunye ka murka
Aneukmiet nyang rhom hantom jituho
Gob dum abeh klo bak jih tueng bila
Uleh seubab nyan beuget tahiro
Umpung keumuto bek toe ngen gata
Yoh mantong ubit umpung tagawo
Meung sampe ubo lethat bahaya
Toe teumpat umum umpama toko
Atau meusaho rumoh sikula
Gedong kuliah dan dayah GoGo
Umpung keumuto sinan han jeuet na
Sabab disinan dum ureueng seso
Meubloe bak toko dan jak sikula
Peuelom disinan dum ureueng bako
Calon dokeuto dengon ulama
Nyang jeuet keu bala hansoe tem hiro
Bah pih hai Dapo maseng bidang na
Na Kebersihan, ruang dum kuto
Miseue hai Cutpo ruang meungaja!!
Satpam leungkap that dum seubo-seubo
Udep meuho-ho soe angkat hana
Maka seubab nyan ji teuka beu-o
Umpung keumuto geushiro hana
Hansoe peurintah hanasoe seudo!!
Nyan pasai beu-o maken meuganda
Hansoe tem lapor takot han hiro
Pimpinan beu-o hantom geuronda
Leupah that saket dikap keumuto
Kalheueh duwa go luntuwan rasa
Meusoe dicatok ngon rame dilho
Kadang nibak Po ajai ka teuka
Dikap sa-duwa ubat ngen hiro
Neumita Cutpo boh Me nyang tuha
Neuplah aneuk Me tipek meuranjo
Dipiep dum keudo ubena bisa!!!
# T.A. Sakti, peminat sastra Aceh.
Saleuem Keu Guree
Oleh: T.A Sakti
Asslamu’alaikom kawom ngon sampee
Meu’ah lon lakee hormat mulia
Lon ci meulike sikrak-dua-lhee
Nyoe phon lon bri thee bak Cendekia
Le Bapak Fairus bak lon geulakee
LIKE meuteuntee keu rubrik sastra
Ulon meukheun han sang meunyum malee
Budaya layee ka geutem bina
Budaya Aceh saheh that layee
Umpama kayee udep meurana
Cit meung tapreh jan jiteuka watee
Budaya padee tinggai meung nama
Alhamdulillah teuhah teurajee
Budaya layee ubat jih kana
Lam Ceudekia lontuan angkee
Sabab geulakee le redakturnya
PKA Limong tanyoe bandum thee
Cit goh gadoh bee banlheueh di Banda
Tacok seumpeuna bek gadoh euntee
Tasibu “kayee” ngat rijang raya
Keu mukaddimah sep ‘ohnoe dilee
Peugisa ulee ho laen teuma
Keu bhah sikula haba meuteuntee
Punca teurajee lam Cendekia
Bacut tapeugah kisah keu guree
Ureueng leubeh thee akhirat donya
Lambong sikula tamat bak D lhee
Jinoe hai sampee rame sarjana
Ilmee meundidik peunoh lam ulee
Pakar nyang bri thee dalam ngon luwa
Uleh seubab nyan geupeunan guree
Cekgu meuteuntee Guru Sikula
Di Malaysia Cekgu nan guree
Disideh teuntee leubeh seujahtra
Sinoe bak tanyoe tapreh dang watee
Poprintah angkee geubri sijahtra
Nyan sertifikasi tanda nyang teuntee
Guru toe ngon bee udep sijahtra
Saba hai Cekgu dang troh lam pangkee
Kon hanya com bee bit-bit sijahtra
Watee mengajar ngon leupie ulee
Bek laju tra-tree murid neu tampa
Karu di rumoh wajeb ta seubee
Bek sampe gob thee ban sigom donya
Bak pomeurintah lon surung kayee
Supaya geuthee saboh seumpeuna
Neu sareng guru nyang na “ meubulee”
Haba meuteuntee BAKAT geuh beuna
‘Ohnoe meumada Saleuem Keu Guree
Meunye na watee ta sambong teuma
Pat tan meukeunong meu’ah lon lakee
Cit hanjeuet ‘kah-kee” buleuen Puasa!!!
T.A. Sakti
2 Ramadhan 1430
Qanun Lumboi Lhee
Bukonle sayang Qanun lumboi lhee
Goh timoh bulee ka keunong wiet pha
Ka gadoh tuwah bagah that layee
Gohlom meuteuntee sihat meugisa
Pasai 36 nyang keunong palee
Anco meu-abee hana meuhoka
Padahai asoe cukop meuteuntee
Get that peureulee bak jinoe masa
Asoe pasai nyan deungo hai sampee
Keu ureueng lakee DPRA-DPRK
Qur^an suci beuna lam ulee
Nyang paleng teuntee beujeuet geubaca
Yoh watee geusah deubat meutabee
Awak lhee ploh lhee seutuju rata
Cit limong blah droe nyang asek ulee
Ka sah hai sampee Qanun mulia
Padum uroe ceh goh timoh bulee
Teuma ka geuthee keudeh Jakarta
Laju pareksa puta teurajee
Sigra geubri thee keunoe u Banda
Meundagri RI ureueng nyang bri thee
Meunoe ban lagee lam surat haba
Pasai 36 payah loet bulee
Sabab roh bajee tingkat negara
Nyang ato Parnas Nasional teuntee
Daerah reudee hana kuasa
Pasai 36 sang jadeh layee
Rugoe meuribee Qanun geupeuna
Teusia payah deubat prah ulee
^Ohka lam pangkee jeuet sia-sia
Abeh ngon dana meujuta ribee
Sang meunyum malee watee takira
Asoe pasai nyan le guna sampee
Kon tok nyang lakee DPRA-DPRK
Aneukmiet Aceh nyang lahee-lahee
Geulantoe kayee awe teuputa
Beu-o beuet Qur^an hana peue lakee
Bupati-DPR bek hawa gata
Meunan nasihat Teungku ngon Guree
Wareh ngon sampee lom Ayah-Bunda
T.A. Sakti
Peminat Sastra Aceh, tinggal di Banda Aceh
Catatan :
-Qanun Lumboi Lhee = Qanun nomor 3 Tahun 2008
-Sampee = Famili; keluarga jauh
-Meutabee = sungguh-sungguh, serius
-Teurajee = benang pengimbang pada layangan
-Parnas = Partai Nasional
-Lahee-lahee = batat, malas
Uram Peunyaket
Uram peunyaket bak Panteue kalam
Ampuh Devayan nyang po calitra
Seunang lam hate lon bri tanggapan
Cit beutoi meunan bak bantah hana
Lam Tambeh Tujoh karya Syekh Salam
Bahle lon reukam meudua banja
Karangan useueng jameun saboh jan
Dalam hitongan dua abad ka
“Asai peunyaket beuna tapham
Makan minom han takira
Nah adak na tabri adat
Han meularat tuboh gata
Soehan tuwan jibri adat
Jeuet meularat le that bahya
Tabiat jikreueh beunak hate
Malee hanle na digata
Lom jeuet malaih ta ibadat
Meu’ah ’ah that pruet teuraya
Kut seb singoh habeh jinoe
Karam siuroe diareuta”
Bak masa jinoe neukalon taulan
Nyang saket badan rab rata rata
Tuha ngon muda hana bedaan
Mungken makanan nyan asai punca
Peunyaket ganaih dumsoe ji lawan
Pangkat jabatan hana jiniet na
Dumho jirabe gampong ngon peukan
Tani neulayan gasien ngon kaya
Habeh areuta meujuta kuyan
Peu-ubat badan mita sijahtra
Lheueh geujeb ubat sihat watee nyan
Habeh ubat nyan saket jigisa
Ladom Singapore jak kontrol badan
U Pulo Pinang han ekle kira
Aceh ka gasien peunyaket kuran
Dinanggroe jiran ka kaya raya
Ubak peumimpin lon peu-ek peusan
Neu mita jalan beusigra-sigra
Pakon peunyaket jinoe le that ban
Jameun dilee tan pakon jinoe na
Keupada rakyat neubri siaran
Neu informasikan pat asai punca
Supaya rakyat bek sabe mumang
Uram saket nyan geuraba-raba
Rame nyang peugah punca bala nyan
Dalam makanan racon meudoda
Meunan meurantam dikamoe awam
Peuekeuh bit meunan lam tanda tanya(?)
Pade meuseumprot gule sayoran
Buah-buahan dum pestisida
Tanle makanan nyan tan racon nyan
Aleh sabab nyan peunyaket teuka(?)
Peumimpin bijak bertindak rijang
Bek jatoh korban le rakyat papa
Bak jak meu-ubat dum meutang ilang
Tiep uroe peukan meuputa gisa
T.A. Sakti
Peminat sastra Aceh
Ubat Gampong
Karya T.A. Sakti
Keu ubat gampong bacut takisah
Lon meubeurakah meudua banja
Ubat endatu watee ka sudah
Hansoele papah jameun ka bida
Jinoe ka canggeh ubat that mudah
Hana that payah bak tajak mita
Asai beuna peng nyang on-on mirah
Meuh’ei sileupah ubat kiminya
Di ureueng gampong sabe lam susah
Seureuba salah ‘ohtee geukira
Ubat that meuh’ei; pade that murah
Peunyaket jajah hana bak tunda
Siare pade hansep pel siblah
Bit popeurintah geukira hana
Yum barang gampong sabe lam murah
‘Oh akhe sudah soe meugoe hana!
Sy’ob hai katuwo keu uram kisah
Lon peuwoe bagah u punca teuma
Proe ubat gampong; boh gadong tuwah
Kumili, birah paleng utama
Endatu tanyoe meunan geupeugah
Boh gadong,birah,kumili tiga
Lam sithon sigo tasak lam babah
Ube na wabah meusiblah dumna
Dumpeue peunyaket Tuhan peusiblah
Ngon Insya Allah teukabo bekna
Gule bak leubue tataguen kuwah
Lam sithon beusah siblet tapeuna
Geukrut putik U peh lada siblah
Tipek beubagah nibak dhoe gata
‘Oh saket ulee sang-sang ka beukah
Deungon Bismillah mustajeueb beuna
Jan saket batok khak-khok sileupah
Mita beubagah on rabon muda
Ramah deungon ie peujeb sikhan glah
Ngon Insya Allah pulehle teuma
Kadang saket pruet na angen mirah
Gambe cok siblah tabicah sigra
Ta upa bak pruet ngat diruet bagah
Ab-’eb bak babah t’ang-t’eung lungkiek pha
Ngon boh keumeudee pih teuntee leupah
Le angen mirah pruet ureueng tuha
Keumadee masak syulok keu lincah
Bahthat bee babah geuntoet that subra
Kadang na kurab lungkiek pha beukah
Meunye na mudah on drang neumita
Ngon gapu ranub neupeh beubicah
Neu intho bagah dalam luengkiek pha
Meunye na teuceue wable seumeurah
Gambe nyang mirah laju neu upa
Ngon on sikleueng-kleueng pih Mustajabah
Sayang sileupah bak jih ka langka
Dum kayee ubat langka sileupah
Dilee Universitas Syiah Kuala na geuci pula
Jiteukale khueng payang sileupah
Lampoh nyang luwah ka “talo” sigra!!!
* T.A. SAKTI, Dosen dan peminat sastra Aceh
Sumber : Harian Serambi Indonesia
Dara Malaih
Syair: T.A Sakti
Adat tayue ji Puasa
Sungkoh raya jikheun beuteng
Lon saket pruet hate peudeh
Han jeuet lon eh meugeunireng
Adat tayue ji seumayang
Ija pinggang jikheun meuluteng
Han ek tarhah geunap uroe
‘Iek aneuk nyoe hanatom kreng
Adat tayue jimeurawe
Beuneung han sabe sirong geunteng
Lulon reukeuet gapeuh meuntah
Ragoe susah meutamah gigeng
Adat tayue jijak muntee
Jilieh alee uleh anjeng
Tutop leusong pi hana got
Asee lenglot digeunireng
Adat tayue manyum eumpang
Iboih pikrang miseue ranteng
Karoh tabloe iboih gajah
Jaroe teumirah han-ek tagileng
Adat tayue ramah santan
Iniem pitan na ngon sareng
Ulon ku-U pi meuth’ot-th’ot
Jaroe han get meupaleng-paleng
Adat tayue peu-ek tayeuen
Rhot di rinyeuen gigoe teuheng
Rinyeun bulat meubalek-balek
Pueh that ta-ek palang-paleng
Beukit tayue jak seumula
Han get banja surang-sareng
Teuma lintah pilon takot
Pakri ngen seuluet hitam galeng
T.A. Sakti, Dosen FKIP Sejarah Unsyiah
Catatan: Ca-e di atas dicuplik dari kitab Tambeh 17.
- Meurawe = bertenun, tradisi perempuan Aceh tempo dulu.
- Lulon = lilin: bahan bertenun
- Ragoe = ragam/ reka bentuk kain tenun
- muntee/mutee = menumbuk padi pada Jingki
- Iniem = sabut pada seludang kelapa dibuatkan saringan
Doda Idi
oleh T.A. Sakti
Allahu Allah Allahu Rabbon
Allah qadiron Maha Kuasa
Masa cut Nabi didalam ayon
Rahmat neupeutron uleh Ilahi
Doda idi putik sukon
Di dalam on jroh meusundi
Kaeh hai Nyak dalam ayon
Makeuh geutron mita raseuki
Jak kuayon putik rambot
Simanyak cut beurijang raya
Beu Tuhan bri umu lanjot
Beuna tapeubuet jalan agama
Allah hai do.. doda idi
Boh campli beurijuek seuba
Beuna umu Tuhan neubri
Boh hate beurijang raya
Lom geukheundo doda idang
Bancalang dilaot raya
Beuta gaseh Uleebalang
Adat naprang nasoe sangga
Nyoe kukheundo doda idi
Mirahpati jeh dipara
Wahe aneuk nyang johari
Beu Tuhan bri rijang raya
Allah haido doda idang
Taloe ayon kulet pisang
Kaeh hai Nyak dalam ayon
Poma geutron jak poh linggang
Ijo-ijo naleueng sambo
Nyangget ijo naleueng sira
Bek kamoele hai aneuk E
Nyoeku kheundo jakku doda
Ie dilaot puteh ijo
Peuraho umbak cencala
Gata hai Nyak ulon dodo
E linto ayeuem mata Ma
T.A. Sakti, pengumpul hikayat Aceh
Catatan: Doda idi adalah nyanyian menidurkan anak dalam bahasa Aceh tempo dulu, yang sekarang sudah langka dilakukan.
*Sumber: Harian Aceh, Banda Aceh
Aceh Leubeh Peng (?)
T.A. Sakti
Meunye leubeh peng tanda ka makmu
Barat ngen timu gob kheun ka kaya
Bak rumoh tangga meunan berlaku
Cit gohlom teuntu bak Nanggroe raya
Miseue di Aceh lon sareh laju
Ujong thon taeu leubeh beulanja
Nyan APBA leubeh meutabu
Salah peulaku, kon tanda kaya!
Anggaran 2008 meunan hai Teungku
Pakar nyang brisu lam surat kaba
Aceh taharap beurijang makmu
Antanjo laku nyang rugoe raya
Aceh leubeh peng kon tanda makmu
Sabab deuh taeu rakyat dum papa
Rakyat lam nanggroe rame hansep bu
Utang meutabu udep seungsara
Jan teungoh meugoe meu-utang laju
Bak bloe minyeuk U meu-utang baja
Watee keumeukoh geubayeue teuntu
Tan tinggai sapeue geupuwoe cit pha
Meupalet-palet udep lam tunu
Hanasoe bantu tansoe pareksa
Anggota Dewan seungab hana su
Rakyat peureulu Pemilu saja!
Rumoh sikula barat ngen timu
Ka reuloh bangku bubong dum guha
Aleue ka beukah binteh ka lhu-lhu
Mija di guru hana seple pha
Peuelom tapeugah keu Dayah Teungku
Siumu-umu lam ala kada
Jareueng na dana keunan geutabu
‘Ohtoe Pemilu rame gob jakba
Lam gle Seulawah jalan u timu
Tiep seun ulon eu tampai ban ija
Reuloh sagoe jeh tanpai sigeutu
Lhee buleuen umu rusak lom teuma
Meunye leubeh peng han meunan laku
Geubloe nyang baru dak miseue ija
Salang toe Banda meunan hai Teungku
Dan lagi itu Jalan Negara
Peue lom diudek tasek beuru-ru
Jeuoh apui hu teuntee han peuja
Jalan disinan wa ‘amma bakdu
Kadeuh droeneuh eu wahe pembaca
Aceh leubeh peng(?) rakyat that tunu
Salah peulaku nyan APBA
Adak han Aceh ka leubeh maju
Rakyat pih makmu peng le meuputa
Dilee yoh diet peng bingkeng ngen tunu
Kheun ini-itu gob ade hana
Jinoe ‘ohle peng dalam Bank tudu
Allah Tuhanku Aceh nyan kada!
Alhamdulillah na koran bri su
Lagee nyan laku hanle meugisa
Thon 2009 anggaran maju
Geusahkan laju Januari teuka
Nyan DPRA meunan geumeusu
Lom pih Pemilu ka dikeue mata
Rakyat ka carong hanpeuele rayu
Buet deungon meusu peuena meutuka(?)
Meunye tan saban haba ngen laku
Rakyat han rindu ji pileh gata
Di kamoe galak peumimpin jitu
Rakyat beumakmu nanggroe sijahtra!!!
T.A. Sakti
Peminat sastra Aceh
Catatan : – sareh = menjelaskan
- APBA = Anggaran Pendapatan Belanja Aceh
- tunu = palak = jengkel
- gatu = senang, gembira
*Sumber: Harian Aceh, Banda Aceh
Timang – timang
Hikayat T.A. Sakti
Allah hai jak kutimang prak
Jeh pirak sijudo dua
Wahe aneuk puteh meuprak
Hate galak lon ngieng gata
Lomku kheun prak kutimang prak
Boh cicak di dalam bara
Buet nyang ka rot bek tagalak
E hai budak bijeh mata
Jak kutimang putik langsat
Cut Amat muda bahlia
Beule aneuk rakan sahbat
Jan meularat nasoe sangga
Jakku timang putik rambot
Beungoh seupot lon peulara
Beule aneuk ureueng ikot
Bek meudhot-dhot narit gata
Jak kutimang putik langsat
Cut Amat muda samlakoe
Beujeuet aneuk ka Hareukat
Laot darat pawang keudroe
Allah hai jak kutimang be
Jeh ceupe peuneugot Cina
Meung na mantong umu sabe
Boh hate tamat neuraca
Jak lon timang bungong geutoe
Keunong uroe layee rata
Beumutuah posamlakoe
Bila nanggroe mat neuraca
Jak lontimang putik bugeng
Cut leunteng rupa samlakoe
Beule aneuk ureueng ireng
Bek meudeungkeng ngon rakan droe
Jak kutimang kutimang bot
Jeh boh rambot diteupin para
Beule aneuk ureueng ikot
Bek na ka rot buet digata
T.A. Sakti, Peminat sastra dan budaya Aceh
Catatan : Timang-timang aneuk di atas dicuplik dari hikayat Banta Keumari, ketika putri Rakna Keumala mengambil Banta Saidi dari ayunan. Agar tidak menangis lantas ditimang-timangnya. Naskah yang semula berhuruf Jawoe itu telah saya salin ke aksara Latin.
*Sumber: Harian Aceh, Banda Aceh
Sumber : http://atjehpusaka.blogspot.com/2009/12/kumpulan-hikayatsyair-dan-pantun-aceh.html
Tidak ada komentar:
Posting Komentar