"10 Boh Tanda Kiamat"

Siploh yang rayek tanda kiamat

Nabi Muhammad meunan neusabda

Oh troek hak watei katoe kiamat

Neubie alamat siploh boh tanda

Tanda yang keu phon nabi hareutoe

Rata jeut nanggroe kayem that geumpa

Tanda keu dua meunan syit bagoe

Rata jeut nanggroe ji ek ie raya

Tanda yang keulhei wahe dum kawom

Keude dum tutong duson ngen kota

Rata jeut nanggroe ta deungoe tutong

Kota ngen gampong habeh seureuta

Tanda yang keu peut wahe dum adoe

Rata jeut nanggroe meuprang saudara

Kafe ngen kafe hana reuda prang

Ureung iseulam pih sama saja

Tanda keu limeng wahe e rakan

Rata jeut simpang meubanja-banja

Ka teudoeng keude rata jeut simpang

Meukat makanan peu-peu yang hawa

Tanda yang keunam wahe duem sahbat

Di lei gasien that jinoe ka kaya

Jinoe ka kaya hareuta le that

Rumoh meu tingkat jeundela kaca

Tanda keu tujoh hai bungoe siren

Kaya dilei kon jinoe ka papa

Habeh hareuta blang deungoen gampoeng

Tinggai keuh untong udep seungsara

Tanda keu lapan neukheun le nabi

Ureung ek haji ramee lagoina

Rame meulimpah ureung ek haji

Ladoem peng suci ladoem peng riba

Tanda si kureung watei ta pandang

Inong ngen agam hana le beda

Inoeng soek luweu agam panyang ok

Sapue that antok awak nyan dua

Tanda keu siploh nabi riwayat

Rayat meularat dusoen ngen kota

Ureng yang meukat rame leupah that

Ka dicok pajak meu lipat ganda